Shpërthen bateria e iphonit në “Apple Store” të Cyrihut, tetë të lënduar

Njëri nga punonjësit ka pësuar djegie të lehtë në njërën dorë ndërsa shtatë persona tjerë kanë marrë trajtim mjekësor në vendin e ngjarjes

Paraditen e sotme, pak pas orës 10 në shitoren e specializuar për prodhimet e Apple (Apple Store) në Bahnhofstrasse të Cyrihut ka shpërthyer tymi, njofton srf.ch. E alarmuar, policia e qytetit ka bërë një ndërhyrje të shpejtë duke evakuuar përkohësisht rreth 50 persona, punonjës të shitores dhe klientë që ndodheshin brenda.

Njëri nga punonjësit ka pësuar djegie të lehtë në njërën dorë ndërsa shtatë persona tjerë kanë marrë trajtim mjekësor në vendin e ngjarjes, transmeton albinfo.ch.

Shkak për këtë aksident ka qenë shpërthimi i një baterie të iphonit, ndërsa policia është duke hetuar rreth shkakut që ka sjellë te mbinxehja e baterisë.

Bëhet fjalë për baterinë e një telefoni 6S Plus, që e kishte sjellë një klient për riparim.