Dënime më të ashpra për kosovarin dhe të tjerët në procesin e tentimvrasjes me porosi

Porositësi i vrasjes së gruas së vet është dënuar me 16 vjet heqje lirie në vend të 14 viteve sa kishte më parë. Ndërsa kosovarit i është rritur masa e dënimit për tentimvrasje nga 14 në 15 vjet

Një kosovar, me porosi të një financieri të pasur nga Gjeneva e kishte sulmuar në shkurt të vitit 2012 bashkëshorten e këtij të fundit me thikë nga mbrapa. Por ajo, e plagosur rëndë kishte shpëtuar nga më e keqja. Kjo ka ndodhur në vitin 2012 dhe kosovari si ekzekutues bashkë me porositësin e krimit dhe dy ndihmësit e vet janë dënuar nga Gjykata e Kantonit të Gjenevës, shkruan sda.ch.

Por Gjykata Federale e Zvicrës i kishte hedhur poshtë dënimet e shkallës kantonale si shumë të buta dhe kishte kërkuar kthimin e lëdnës në rigjykim.

Dënimi me 14 vjet burg për financierin e pasur nga Gjeneva i cili kishte porositur një kosovar për t`ia vrarë të shoqen, është shumë i butë, sipas Gjykatës Federale. Sipas gjykatësve nga Lozana faji i bashkëshortit peshon rëndë. Ai, ndërkohë që gruas së tij i bënte dhurata, po planifikonte vrasjen e saj, transmeton albinfo.ch. Veç kësaj, edhe vetë plani për vrasje kishte qenë shumë i ulët, duke qenë se sipas porosisë së tij, vrasja do të inskenohej si një sulm për plaçkitje.

Gjykata Federale ka miratuar akuzën e bërë nga Prokuroria e Gjenevës (që gjykata e Gjenevës e kishte shpërfillur) edhe sa i përket kosovarit. Edhe ai është dënuar me 14 vjet heqje lirie gjë që, sipas Lozanës, është një dënim shumë i butë.

Gjykata e Gjenevës është dashur të shqiptonte një dënim shumë më të ashpër për personin i cili kishte vendosur të vriste një grua në mënyrë gjakftohtë dhe kundrejt një pagese, thotë gjykata më e lartë e vendit. Kosovari kishte provuar disa herë brenda disa muajve të bënte sulmin e porositur, transmeton albinfo.ch. Ndërsa edhe dënimet me 9 gjegjësisht 7 vjet burg për dy pjesëmarrës të tjerë në sulm, janë sipas Lozanës, tepër të buta.

Duke ndjekur vërejtjet nga Lozana, Gjykata Kantonale në vendimin e shqiptuar sot ka ngritur masën e dënimit të të katër të akuzuarve. Kështu, porositësi i vrasjes së gruas së vet është dënuar me 16 vjet heqje lirie në vend të 14 viteve sa kishte më parë. Ndërsa kosovarit i është rritur masa e dënimit për tentimvrasje nga 14 në 15 vjet. Njëri nga dy ndihmësit e tij ka marrë 12 në vend të 9 viteve burg ndërsa tjetri, që ka mbajtur lidhjet mes tre meshkujve ka marrë tash 11.5 vjet burg në vend të 7 sa kishte.

Avokati i ndihmësve të kosovarit ka paralajmëruar ankesë në Gjykatën Federale për shkak të dënimeve tepër të ashpra, siç ka thënë ai.