Shumë shtetas të Shqipërisë përdorin fëmijët, me qëllim që të fitojnë azilin

Shumë shtetas të Shqipërisë përdorin fëmijët, me qëllim që të fitojnë azilin

Katër shtetas të Shqipërisë janë vendosur nën hetim për braktisje të të miturve, pasi, siç rezulton, ata janë rikthyer duke i lënë fëmijët jashtë vendit me qëllim azilin.

Ata u ndalën në aeroport nga ku më herët kishin kaluar së bashku me fëmijët. Sipas “Top Channel” rastet e braktisjes së fëmijëve për qëllim azili janë regjistruar në shumë vende të Bashkimit Evropian, përcjell albinfo.ch.

Sipas policisë italiane për çdo muaj mesatarisht 70 të mitur shqiptarë dorëzohen pranë shërbimeve sociale duke u vetëdeklaruar të braktisur nga prindërit.

Matilda Tyli, ndihmëskomisionerja për mbrojtjen e të miturve pranë Avokatit të Popullit shprehet se të njëjtën skemë prindërit shqiptarë po e përdorin për fëmijët e tyre edhe në Britani dhe Francë.

Deri më tani, Gjykata e Tiranës ka dënuar dy shtetas, pasi, sipas hetimeve, rezultojnë nga sistemi TIMS të kenë udhëtuar jashtë vendit me fëmijët e tyre, por janë kthyer pas pa ta.