Fokusi i Bashkisë së Tiranës, tash në zonat rurale

Veliaj: “Angazhimi i Bashkisë së Tiranës është që në dy vitet e ardhshme fokusin më të madh ta kemi tek fshati"

Kryetari i Tiranës Erion Veliaj, ka deklaruar se fokusi i punës së qeverisjes së tij në dy vitet e ardhshme do të jetë përmirësimi i infrastrukturës në zonat rurale. Ai këto komente i bëri në ceremoninë e përfundimit të njërës nga ndërhyrjet më të rëndësishme në kompleksin turistik Pëllumbas që i hap rrugën dhe një faze të re të turizmit të aventurës në Tiranë.

Veliaj deklaroi se investime të tilla janë një mundësi shumë e mirë për zhvillimin e këtyre zonave. “Angazhimi i Bashkisë së Tiranës është që në dy vitet e ardhshme fokusin më të madh ta kemi tek fshati. Besoj se na keni parë nga shkolla në Shëngjergj, tek rrugën në Zall-Herr. Tek investimet që po bëjmë në zonat periferike të Tiranës, sepse besojmë vetëm kur punohet me të njëjtën cilësi si në sheshin “Skënderbej”, si në Pazarin e Ri, si në Pëllumbas, si në Kërrabë, vetëm atëherë mund të themi që qyteti po ecën me të njëjtën cilësi”, ka deklaruar Velija.