700 mijë veta kanë vizituar Autosallonin e Gjenevës

260 ekspozues nga 30 vende kanë ekspozuar 1000 makina, në një sipërfaqe prej më shumë se 100 mijë metra katrorë

Salloni i automobilave, i Gjenevës, i 82-ti me radhë, ka tërhequr drejt qytetit buzë liqenit të Lemanit mbi 700 mijë vizitorë, që janë pak më pak se vitin e kaluar. Megjithatë, organizatorët u treguan të kënaqur në përmbylljen e sallonit, shkruan swissinfo.ch.

Njëri ndër sukseset e kësaj ekspozite të madhe të veturave ka qenë sivjet “Salloni i gjelbër”, në hyrje të ndërtesës. Rreth 10 mijë ngasës kanë shfrytëzuar nga rasti për të bërë një vozitje provuese me një veturë që vihet në lëvizje me materie ekologjike.

Gjatë sallonit, 260 ekspozues nga 30 vende kanë ekspozuar 1000 makina, në një sipërfaqe prej më shumë se 100 mijë metra katrorë (10 hektarë). Në këtë mes kanë qenë 150 premiera evropiane dhe botërore. Sipas organizatorëve, për sallonin kanë raportuar 11680 gazetarë nga 80 vende të botës.

Salloni in ardhshëm do të mbahet nga 7 deri më 17 mars të vitit 2013 me ç`rast pritet që hapësira për ekspozim të jetë më e madhe se sivjet.