Kosovë: 48 milionë euro dyshohet se u keqpërdorën për shpronësime në autostradë

Sipas ministrit kosovar të Financave, Hekuran Murati, 48 milionë euro u keqpërdoren nga Qeveria Haradinaj për shpronësime në autostradën Prishtinë-Pejë

Qeveria Kurti ka denoncuar sot një aferë të dyshuar keqpërdorimi. Ministri i Financave, Hekuran Murati, në një konferencë për media ka drejtuar gishtin drejt ish-Qeverisë së udhëhequr nga Ramush Haradinaj.

Sipas tij, këto gjetje kanë dalë nga ka auditori.

“Disa prej gjetjeve nga një raport i auditimit të brendshëm që është bërë në lidhje me procesin e shpronësimit për njërin nga projektet, pra për autostradën Kijevë-Zahaç, apo siç njihet Prishtinë-Pejë. Në vazhdimësi kemi thënë se me shpronësimet dhe projektet e mëdha ka pasur dallavere dhe keqpërdorime. Tani i kemi edhe shifra. Bëhet fjalë për një keqpërdorim 48 milionë eurosh dhe brenda këtyre ka dyshime të mjaftueshme për të konstatuar se bëhet fjalë për flasifikim të 12 milionë eurove. Ministria e Infrastrukturës më 24 gusht 2018 ka kërkuar nga Ministria e Mjedisit dhe Planifikimit Hapësinor, po flasim për Qeverinë e PAN, pra për Qeverinë Haradinaj, në atë shkresë kërkon që të fillohet procesi i shpronësimit për segmentin ku do të shpronësoheshin 1050 prona”, tha Murati, transmeton Albinfo.ch.

Sipas Muratit, disa pronave u është shumëfishuar vlera. “Pronat që janë ngjitur me njëra-tjetrën, njëra është shpronësuar 800 euro ari, kurse tjetra 3500 euro ari. Kjo 3500 është bërë 7000 derisa kjo tjetra ka mbetur 800”, theksoi ai.

Murati paralajmëroi se do ta dërgojë rastin në prokurori që nesër.

---