42 vjet nget veturën pa patentë shoferi

60 vjeçari që po voziste prej moshës së tij 18 vjeçare, nuk kishte pasur kurrë patentë shoferi

Që të mos ketë dilema, që në fillim: çudia nuk ka ndodhur në ndonjë vend të botës së tretë apo në Ballkan, siç mund të pritej. Kjo gjë ka ndodhur në Zvicër!

Një burrë 60 vjeçar, zviceran, shkon në stacionin policor, në Sursee të Lucernit  për të paraqitur rastin e vjedhjes që i ishte bërë. Por, policët e vërejnë se ai ishte nën ndikimin e alkoolit dhe para se t`ia qajnë hallin e vjedhjes, ia bëjnë matjen e alkoolit në gjak. 1.79 promilë ishte rezultati i testit, një dozë kjo shumë e lartë për ata që duan të ngasin automjetin.

Për këtë arsye policët vendosin t`ia marrin në vend patentë shoferin, njoftohet në një komunikatë për medie të Prokurorisë së përgjithshme të Lucernit.

Por këtu i pret ata befasia e madhe. Ata nuk kanë çfarë t`i marrin shoferit të alkoolizuar: 60 vjeçari që po voziste prej moshës së tij 18 vjeçare, nuk kishte pasur kurrë patentë shoferi.