26-vjeçari shqiptar diplomon për Mjekësi në Universitetin e Kopenhagës

Astrit Rakipi, shqiptari që diplomoi për Mjekësi në një nga universitetet më prestigjioze të Danimarkës

Një tjetër histori suksesi vjen nga komuniteti shqiptar në Danimarkë. Astrit Rakipi, 26 vjeç, ka përfunduar me sukses studimet në Mjekësi në Universitetin e Kopenhagës, duke fituar titullin e mjekut dhe duke diplomuar me notën më të lartë, transmeton albinfo.ch. 

I lindur dhe i shkolluar në Kopenhagë, Astriti është me prejardhje nga fshati Nerasht i Tetovës. Ai kreu arsimin fillor në kryeqytetin danez, vazhdoi shkollimin në Frederiksberg Gymnasium dhe më pas përfundoi studimet në Fakultetin e Mjekësisë pranë Universitetit të Kopenhagës.

Arritja e tij vjen pas gjashtë vitesh përkushtimi, pune intensive dhe rezultateve të shkëlqyera akademike, duke u bërë një tjetër shembull frymëzues i suksesit të të rinjve shqiptarë në diasporë.

Për këtë sukses ka reaguar me krenari edhe babai i tij, Besnik Rakipi, i cili përmes një mesazhi emocionues vlerësoi rrugëtimin e të birit.

“Sot, Astriti u bë doktor i diplomuar me notën më të lartë. Kanë kaluar 6 vite punë të palodhshme, por ti ke arritur një sukses të jashtëzakonshëm dhe me nota të shkëlqyera gjatë gjithë rrugës. Krenohemi me ty, biri im. Të dëshirojmë gjithë të mirat për të ardhmen”, ka shkruar ai.

Suksesi i Astrit Rakipit është pritur me gëzim dhe krenari nga familja, miqtë dhe bashkatdhetarët e tij në Danimarkë dhe më gjerë, duke dëshmuar edhe një herë potencialin dhe përkushtimin e shqiptarëve në fushën e arsimit dhe shkencës./Albinfo.ch

---