Zyrtare: Berat Gjimshiti largohet nga Atalanta dhe transferohet te Al-Diriyah

(KEYSTONE/Steffen Schmidt)

Berat Gjimshiti ka nisur një kapitull të ri në karrierën e tij, pasi mbrojtësi dhe kapiteni i Kombëtares shqiptare është prezantuar zyrtarisht si futbollist i Al-Diriyah në Arabinë Saudite.

Futbollisti shqiptar ka firmosur një marrëveshje dyvjeçare me klubin saudit, duke i dhënë fund një periudhe më shumë se 10-vjeçare në futbollin italian. Transferimi nga Atalanta raportohet se është realizuar për rreth 3 milionë euro.

Gjithashtu, Gjimshiti pritet të përfitojë rreth 3 milionë euro në sezon, çka e çon vlerën e pagës së tij për dy vitet e kontratës në afërsisht 6 milionë euro.

Pas 334 ndeshjeve me fanellën e Atalantës, mbrojtësi shqiptar largohet nga klubi bergamask me një bilanc të rëndësishëm. Momenti më i spikatur ishte triumfi në UEFA Europa League, një prej sukseseve më të mëdha në historinë e klubit italian.

Tashmë, Gjimshiti do të vazhdojë karrierën në Arabinë Saudite, ku pritet të ketë një rol të rëndësishëm te Al-Diriyah.

Ndërkohë, Gjimshiti nuk është i vetmi lojtar i Kombëtares shqiptare që është transferuar këtë periudhë në Arabinë Saudite. Nedim Bajrami i është bashkuar Al-Taawoun në formën e huazimit.