Zvicra mobilizohet kundër rrezikut terrorist

Një taskforcë e Fedpolit qëndron në kontakt me policitë kantonale të kantoneve ku ekzistojnë aeroporte ndërkombëtare

Pas sulmeve të djeshme terroriste në Bruksel, Policia Federale (Fedpol) është duke e testuar në vazhdimësi shkallën e rrezikshmërisë së situatës. Një taskforcë e Fedpolit qëndron në kontakt me policitë kantonale të kantoneve ku ekzistojnë aeroporte ndërkombëtare, respektivisht me ato të Cyrihut, Bazelit dhe Gjenevës si dhe në të njëjtën kohë edhe me shtabin drejtues të policisë në nivelin nacional. Për masat konkrete të sigurisë, përgjegjësia mbetet te trupat policore të kantoneve, shkruan srf.ch.

Në të njëjtën kohë janë anuluar të gjitha fluturimet nga Zvicra në drejtim të Brukselit.

Sipas Ndërmarrjes Federale të Hekurudhave (SBB/CFF) ende mbetet e paqartë se si do të rregullohet qarkullimi i planifilkuar trenave në drejtim të Brukselit, transmeton albinfo.ch.

Ministria e Punëve të Jashtme e Zvicrës ka aktivizuar një linjë telefonike për informimin e atyre që udhëtojnë drejt Brukselit. Të dhënat për kontaktet mund të gjenden në faqen e internetit të ministrisë së përmendur-.