Zvicra miraton zgjerimin e lëvizjes së lirë me Kroacinë

Deputeti i SVP-së, Köppel e ka kritikuar ashpër ministren e drejtësisë Simonetta Sommaruga se “po i qaset me lehtësi të padurueshme kushtetutës”. Pas kësaj, Sommaruga dhe grupi parlamentar i saj e kanë braktisur sallën

Zvicra përfundimisht mund të zgjerojë marrëveshjen për lëvizje të lirë edhe me Kroacinë. Dhoma Nacionale e Parlamentit të Zvicrës e ka miratuar sot protokollin tashmë të nënshkruar nga Këshilli Federal (qeveria) për këtë çështje, raportojnë mediet zvicerane. Vendimi për zgjerim është marrë me shumicë votash: 133 ishin pro dhe 64 kundër.

Kundërshtarë të miratimit të këtij protokolli kanë qenë vetëm deputetët e SVP/UDC-së ndërsa të gjitha grupet tjera partiake ishin në favor, transmeton albinfo.ch. Deputeti i SVP-së Köppel e ka kritikuar ashpër ministren e drejtësisë Simonetta Sommaruga se “po i qaset me lehtësi të padurueshme kushtetutës”. Pas kësaj, Sommaruga dhe grupi parlamentar i saj e kanë braktisur sallën.

Që nga votimi i iniciativës kundër migrimit masiv, kushtetuta ndalon marrëveshjet e reja ndërkombëtare të cilat nuk e kanë përfshirë brenda tyre edhe çështjen  e migracionit nga vendet përkatëse. Kjo ka qenë dhe arsyeja që dy dhomat e parlamentit kishin dilema nëse ratifikimi i marrëveshjes në këtë rast është kushtetues ose jo.

Shumica e grupeve parlamentare ishin të bindura se ai është brenda kushtetutës. Por ratifikimi mund të ishte kundërkushtetues vetëm nëse deri në atë moment nuk do të ketë ujdi me BE-në lidhur me kufizimin e migracionit