Zvicra, me plan emergjent për azilin

Zhvillimet në fushë të azilit nuk mund të parashikohen me saktësi, prandaj nevojiten më shumë se një skenar, ka thënë për mediat një zëdhënës i Departamentit Federal për Drejtësi

Një plan emergjent për azilin ka qenë temë e marrëveshjes që kanë arritur së fundi federata, kantonet, qytetet dhe komunat. Ky plan përmban një numër skenarësh të cilët parashikojnë se si mund të veprohen në varësi nga zhvillimi i situatës.

Sigurisht, zhvillimet në fushë të azilit nuk mund të parashikohen me saktësi, prandaj nevojiten më shumë se një skenar, ka thënë për mediat një zëdhënës i Departamentit Federal për Drejtësi, shkruan srf.ch.

Sipas planit emergjent, federata vazhdon të mbetet përgjegjëse për regjistrimin dhe strehimin fillestar të azilkërkuesve, transmeton albinfo.ch.

Sekretariati Shtetëror për Migracion (SEM) sipas planit të përmendur do të duhej të rrisë kapacitetin e strehimit nga 4600 vende sa i ka sot në 6000 sish ndërsa në skenarin ekstrem deri në 9000 vende për strehim.

Caku përfundimtar është që të bëhet i mundur regjistrimi dhe verifikimi i azilkërkuesve, para se ata të shpërndahen nëpër kantone.