Zvicra investon 8.78 milionë franga për transformimin e gjelbër të bizneseve në Kosovë

Marrëveshja pesëvjeçare synon të rrisë konkurrueshmërinë e ndërmarrjeve private, të nxisë investimet e gjelbra dhe të krijojë vende të reja pune.

Kosova dhe Zvicra kanë nënshkruar një marrëveshje të rëndësishme bashkëpunimi për mbështetjen e transformimit të gjelbër të sektorit privat në vend, transmeton albinfo.ch.

Marrëveshja pesëvjeçare për projektin “Transformimi i Gjelbër i Ndërmarrjeve Private në Kosovë (GPEK)” u nënshkrua ndërmjet Ministrisë së Industrisë, Ndërmarrësisë, Tregtisë dhe Inovacionit dhe Agjencisë Zvicerane për Zhvillim dhe Bashkëpunim (SDC), në prani të ambasadorit të Zvicrës në Kosovë, Jürg Sprecher.

Projekti do të zbatohet gjatë periudhës 2026–2031 dhe ka një buxhet të përgjithshëm prej 8.78 milionë frangash zvicerane. Ai financohet nga SDC me bashkëfinancim nga SIDA.

Qëllimi kryesor i projektit është të mbështesë ndërmarrjet e vogla dhe të mesme në Kosovë në tranzicionin drejt praktikave më të qëndrueshme dhe teknologjive më të pastra, duke rritur efikasitetin e përdorimit të burimeve dhe konkurrueshmërinë e tyre në treg.

Sipas njoftimit, iniciativa është në përputhje me objektivat strategjike të ministrisë dhe synon të krijojë mundësi të reja për inovacion, të fuqizojë kategoritë e nënpërfaqësuara dhe të forcojë rolin e sektorit privat në zhvillimin ekonomik të vendit.

Përmes këtij bashkëpunimi pritet të promovohen investimet e gjelbra, zhvillimi i teknologjive inovative dhe krijimi i vendeve të reja të punës, duke kontribuar në ndërtimin e një ekonomie më të qëndrueshme dhe më konkurruese për Kosovën.

Autoritetet kosovare kanë shprehur mirënjohje për Qeverinë e Zvicrës, SDC-në, SIDA-n dhe partnerët e tjerë ndërkombëtarë për mbështetjen e vazhdueshme dhe besimin në potencialin zhvillimor dhe ekonomik të Kosovës./Albinfo.ch

---