Zvicra i thotë jo zhvendosjes së emigrantëve nga Italia dhe Greqia

Qeveria e tanishme italiane ka marrë një qasje të ashpër për migrantët që vijnë në brigjet e saj me qëllim të bindjes së vendeve të tjera të BE-së që të bëjnë "pjesën e drejtë" të tyre.

Foto ilustrim

Zvicra ka hedhur poshtë një program të dytë të zhvendosjes së azilkërkuesve të propozuar nga Bashkimi Evropian për të lehtësuar barrën e vendeve kufitare si Italia dhe Greqia.

Sipas gazetës zvceriane ‘Blick’, një zëdhënës nga Sekretariati Shtetëror për Migracionin (SEM) ka konfirmuar se Zvicra nuk do të ripërtërijë angazhimin e saj për të pranuar azilkërkues nga vendet e Evropës Jugore.

Kombi alpine kishte marrë pjesë në programin e parë të zhvendosjes në vitin 2015, duke u zotuar të merrte 1 mijw e 500 azilkërkues nga Italia dhe Greqia.

Deri tani, 902 azilkërkues nga Italia dhe 579 nga Greqia janë pranuar në programin e parë të zhvendosjes, shkruan Albinfo.ch.

BE kishte nisur një program të dytë të zhvendosjes vjeshtën e kaluar dhe në një letër nga komisioneri i BE për emigracionin Dimitris Avramopulos, gjithashtu u kërkua nga Zvicra që të akomodojë sa më shumë njerëz të jetë e mundur. Kërkesa u refuzua.

Sipas SEM, nuk ka më njerëz të mjaftueshëm në Greqi dhe Itali që përmbushin kriteret për rivendosje, thotë artikulli i botuar të dielën.

Sipas këtyre kritereve, personat duhet të jenë regjistruar nga autoritetet e migracionit të BE përpara tetorit 2017 dhe kanë një shans shumë të lartë për marrjen e një vendimi pozitiv për azil.