Zvicra dërgon tre helikopterë për shuarjen e zjarreve në Portugali

Së bashku me helikopterët, në Portugali dërgohet edhe personeli përkatës, prej 30 ushtarakësh

Zvicra do të dërgojë tre helikopterë ushtarakë të tipit “Superpuma” për të ndihmuar në fikjen e zjarreve që kanë kapluar Portugalinë, shkruan srf.ch. Një vendim për këtë e ka miratuar Këshilli Federal, i cili ka vendosur që së bashku me helikopterët, në Portugali të dërgohet edhe personeli përkatës, prej 30 ushtarakësh.

Helikopterët do të  angazhohen në shuarjen e zjarreve në afërsi të qytetit Monte Real rreth 100 kilometra në veri të Lisbonës.

Drejtoria për Zhvillim dhe Bashkëpunim DEZA, krahas kësaj, në Portugali do të dërgojë edhe katër specialistë, transmeton albinfo.ch. Ky grup do të mbështesë ushtarakët dhe do të sigurojë bashkëpunimin me forcat portugeze të ndërhyrjes.