Zvicra bëhet me ligj më të ashpër kundër terrorizmit

Sipas nënkryetarit të Konferencës së Drejtorëve Kantonalë të Policisë dhe Drejtësisë, Beat Villiger, me ashpërsimin e synuar, ligji përkatës i Zvicrës do të barazohej me atë që vepron në rrafsh ndërkombëtar

Ilustrim

Islamistët, ashtu si dhe të tjerët që mbështesin terrorizmin duhet të trajtohen me një ligj të ri, më të ashpër. Siç shkruan gazeta «SonntagsBlick», tashmë ekzistion projektligji përkatës, sipas të cilit, dënimet do të shqiptohen edhe për vepra penale më të buta të kësaj natyre.

Sipas asaj që parasheh projektligji në fjalë, do të jetë e dënueshme panalisht secila mbështetje e terrorizmit, përcjell albinfo.ch. Këtu përfshihen si «fjetësit» (simpatizantët e `maskuar`të terrorizmit) ashtu dhe personat që përhapin propagandë. Krahas kësaj, dënimet duhet të jenë më të ashpra: nuk do të ketë më fare dënime me gjobë ndërsa për personat në funksione drejtuese do të hiqet krejtësisht pragu i dënimit me burg.

Sipas nënkryetarit të Konferencës së Drejtorëve Kantonalë të Policisë dhe Drejtësisë, Beat Villiger, me ashpërsimin e synuar, ligji përkatës i Zvicrës do të barazohej me atë që vepron në rrafsh ndërkombëtar.

Projektligji është përpiluar nga një grup ekspertësh, të cilët, me kërkesën e Zyrës Federale për Drejtësi i kanë përpunuar propozimet në drejtim të ashpërsimit të ligjit. Parlamenti i Zvicrës do të jetë ai që do të marë vendimin përfundimtar për ligjin.