Zviceranët dhurojnë 6 milionë franga për refugjatët

Kjo shumë parash është grumbulluar brenda një jave ndërsa në aksion ka marrë pjesë edhe presidenti i Federatës, Didier Burkhalter

Aksioni humanitar “Jeder Rappen zählt” (çdo cent ia vlen), i organizuar nga Radiotelevizioni i Zvicrës dhe organizata humanitare “Glückskette” ka mbledhur 6 milionë e 127.335 franga. Kjo shumë parash, e grumbulluar brenda një jave u dedikohet familjeve refugjate.

“Glükskette” synon që familjeve në fjalë t`ua mundësojë pasjen e gjërave më të domosdoshme: artikujve ushqimorë, ujit, vendin për strehim  si dhe ndihmën mjekësore e psikologjike. 

Moderatorët Tina Nägeli, Nik Hartmann dhe Philippe Gerber kanë qëndruar për shtatë ditë të plota në kutinë prej qelqi në Europaplatz të Lucernit, që ishte qendra e aksionit për grumbullimin e ndihmave.

Në mesin e mysafirëve të shumtë eminentë të tyre kanë qenë presidenti federal Didier Burkhalter, reperi Stress, Noah Veraguth dhe reperi Knackenboul etj.Burkhalter madje ka kënduar bashkë me këngëtarin Bastian Backer.

Edhe pjesëmarrësit tjerë të njohur, me nga një veprim simbolik janë solidarizuar me aksionin dhe kanë ndihmuar edhe konkretisht zhvillimin e tij.