Zvicër: Rritet mbështetja për NATO-n, bie besimi absolut në neutralitet

(KEYSTONE/Anthony Anex)

Një studim vjetor i realizuar nga Akademia Ushtarake (Milak) dhe ETH Cyrih tregon ndryshime të dukshme në opinionin publik zviceran për sigurinë, ushtrinë dhe politikën e jashtme.

Sipas të dhënave të “Security 2026”, 56% e qytetarëve mbështesin rritjen e bashkëpunimit të Zvicrës me vendet e NATO-s, niveli më i lartë i regjistruar që nga viti 1993. Megjithatë, shumica mbeten kundër anëtarësimit të plotë në aleancë.

Studimi tregon gjithashtu se mbështetja për neutralitetin e vendit, ndonëse mbetet e lartë në rreth 85%, po vihet gjithnjë e më shumë në diskutim. Rreth 43% e të anketuarve besojnë se një aleancë evropiane e sigurisë do të ofronte më shumë mbrojtje sesa neutraliteti.

Sondazhi tregon një shoqëri të ndarë edhe për buxhetin e ushtrisë: një pjesë kërkon rritje të shpenzimeve, një pjesë mendon se janë të mjaftueshme, ndërsa të tjerët i konsiderojnë të tepërta. Megjithatë, tendenca për mbështetje më të madhe ndaj ushtrisë është në rritje.

Studiuesit theksojnë se ndryshimet në opinion lidhen me situatën globale të pasigurt dhe konfliktet ndërkombëtare, të cilat kanë rritur ndjeshmërinë e qytetarëve ndaj çështjeve të sigurisë.

Në përgjithësi, raporti përfundon se Zvicra po largohet nga imazhi i një “ishulli të izoluar të stabilitetit” dhe po shihet gjithnjë e më shumë si pjesë e ndërvarur e krizave globale.