Zjarr tragjik në një spital në Gjermani, dy persona humbin jetën dhe dhjetëra të tjerë plagosen

Flakët përfshinë çatinë e spitalit në Ludwigslust, ndërsa pacientët dhe stafi u evakuuan me urgjencë

Një zjarr i rëndë ka shpërthyer në orët e para të mëngjesit të së enjtes në një spital në qytetin Ludwigslust të Gjermanisë, duke lënë të paktën dy persona të vdekur dhe rreth 30 të plagosur, transmeton albinfo.ch.

Sipas policisë gjermane, flakët përfshinë çatinë e ndërtesës, duke detyruar autoritetet të evakuojnë pacientët dhe stafin mjekësor. Spitali, i cili është i vetmi në qytet, ka një kapacitet prej rreth 160 shtretërsh.

Shërbimet emergjente ndërhynë menjëherë për të vënë nën kontroll zjarrin dhe për të ndihmuar në evakuimin e personave që ndodheshin brenda objektit.

Shkaqet e zjarrit ende nuk janë bërë të ditura, ndërsa autoritetet kanë nisur hetimet për të zbardhur rrethanat e ngjarjes.

Ludwigslust ndodhet në landin Mecklenburg-Pomerania Perëndimore, rreth 40 kilometra në jug të kryeqytetit rajonal, Schwerin./Albinfo.ch

---