Zari Xhaferi, kandidat për Qeverinë e Kantonit Zug

Nëse do t`ia dalë të zgjidhet, Xhaferi do të jetë politikani i parë me prejardhje shqiptare në ekzekutivin e një kantoni

Zari Xhaferi (Dzaferi), politikani i Partisë Socialdemokrate me rrënjë shqiptare, deputet në Parlamentin e Kantonit të Zug-ut, është kandiduar edhe për ekzekutivin e kantonit. SP-ja e këtij kantoni në kuvendin e saj partiak të mbajtur të enjten ka vendosur që Xhaferin ta kandidojë për një vend në Qeverinë shtatë anëtarëshe Kantonale, që ka mbetur i zbrazët pas zgjedhjes në përfaqësuesit të CVP-së Peter Hegglin deputet në Dhomën e Kantoneve. Ai mbante postin e përgjegjësit për financa, transmeton albinfo.ch.

Zgjedhja për vendin vakant në qeveri do të bëhet më 17 janar 2016. Me atë rast CVP-ja sjell kandidatin e vet, politikanin Martin Pfister, i cili është nominuar të mërkurën.

Aktualisht ezekutivin e Kantonit të Zugut e pëbëjnë nga dy përfaqësues të CVP-së, FDP-së dhe SVP-së si dhe një përfaqësuese e ALG-së (Alternativa e Gjelbër).

Kandidimin e Xhaferit në një ekzekutiv që nuk ka pasur asnjë përfaqësues të SP-së, kjo parti e arsyeton duke e vlerësuar përvojën e tij si deputet në legjislaturën e dytë në Parlamentin e Kantonit. Ai është bërë i njohur si politikan që vlerësohet edhe nga jashtë partisë së tij, thuhet në shkresën e SP-së.

Zari Xhaferi është nënkryetar i SP-së së Kantonit Zug dhe kryetar i SP-së për qytetin Baar, ku jeton.

Ai ka qenë kandidat në zgjedhjet për Parlamentin Nacional të Zvicrës që u mbajtën muajin e kaluar.

Duke iu drejtuar rrethit të tij shoqëror në facebook, Zariu flet për përvojat e tij si politikan dhe mësues e gazetar, profesione që ai i ushtron prej sa vitesh. “Jam i bindur se me përvojën time dhe me prirjen për punë ekipore do të sjell me vete një bazë solide për punë në ekzekutiv”.

Nga ana tjetër, siç vlerësohet në mediet e Zug-ut dhe të Luzernit, kandidimi i Xhaferit edhe pse i bërë njëzëri nga SP-ja, është shoqëruar nga një skepticizëm në vetë bazën partiake, transmeton albinfo.ch. Kjo për faktin se në këtë kanton partitë e djathta janë më të fuqishme dhe kanë bazë të pakonestueshme. Sidomos fakti se vendi i lirë pretendohet nga CVP-ja, parti me bazë të gjerë në kanton e bën edhe me të vështirë depërtimin e Zari Xhaferit 30 vjeçar në ekzekutiv.

Nëse megjithatë do t`ia dalë të zgjidhet, Xhaferi do të jetë politikani i parë me prejardhje shqiptare në ekzekutivin e një kantoni.

Albinfo.ch ka ndjekur rrugën e ngritjes politike të Zariut që nga fillimi. Në një intervistë të realizuar pas zgjedhjes së tij deputet kantoni, rreth 5 vjet më parë, ai kishte treguar ambicie edhe për politikën në rrafshin ekzekutiv, por duke e  vendosur atë “në një të ardhme”. Mbetet të pritet muaji janar për të parë nëse kjo “e ardhme” ka ardhur.