Xhaka renditet i treti në Botëror për pasimet më të shumta drejt sulmit

Granit Xhaka ndër mesfushorët më dominues të Kupës së Botës, renditet i treti për pasimet vertikale në gjysmën kundërshtare

Kapiteni i Zvicrës, Granit Xhaka, po vazhdon të dëshmojë edhe në Kupën e Botës se është shumë më tepër sesa një mesfushor që luan vetëm pasime anësore apo prapa, transmeton albinfo.ch.

Sipas të dhënave të publikuara nga CIES Football Observatory, Xhaka renditet në vendin e tretë mes të gjithë mesfushorëve që kanë luajtur në fazën e 1/16 së finales, për përqindjen e pasimeve vertikale të realizuara në gjysmën e fushës së kundërshtarit.

Mesfushori shqiptar i Zvicrës ka regjistruar 30.4 për qind të pasimeve të tij në drejtim përpara në zonën kundërshtare, duke u renditur vetëm pas norvegjezit Martin Ødegaard (35.7%) dhe australianit Aiden O’Neill (34.0%).

Pas Xhakës në këtë listë vijnë Nathan Saliba i Kanadasë (29.1%), Pape Gueye (28.6%) dhe Idrissa Gueye (28.4%) të Senegalit, Elliot Anderson i Anglisë (27.7%), Nabil Bentaleb i Algjerisë (26.7%), Luka Modrić i Kroacisë (26.4%) dhe Felix Nmecha i Gjermanisë (26.3%).

Statistikat hedhin poshtë kritikat e kahershme se Xhaka luan vetëm pasime anësore ose prapa, duke dëshmuar se kapiteni i Zvicrës është ndër mesfushorët më progresivë të këtij Botërori, me një rol kyç në ndërtimin e sulmeve dhe avancimin e lojës së ekipit helvet./Albinfo.ch

---