Wadephul: Gjermania nuk do të frikësohet nga Rusia pas incidentit me dronin në Leipzig

@unsplash

Gjermania do të reagojë me kujdes ndaj incidentit të ndodhur në aeroportin “Leipzig/Halle”, ku në fillim të gushtit u zbulua një dron i pajisur me eksplozivë pranë avionëve ukrainas të mallrave.

Ministri i Jashtëm gjerman, Johann Wadephul, deklaroi se Berlini nuk do të lejojë që kërcënimet e mundshme nga Rusia të ndikojnë në qëndrimin e tij politik. Ai theksoi se Gjermania do të përgjigjet në rast se sulmohet, duke ruajtur një qasje të matur dhe të koordinuar me partnerët e saj.

“Gjermania nuk do të frikësohet në asnjë mënyrë dhe kjo do të vazhdojë të jetë qëndrimi themelor i politikës sonë”, u shpreh Wadephul gjatë vizitës së tij në Algjer.

Sipas ministrit, Gjermania mbetet në krah të Ukrainës dhe synon të luajë rolin e një force stabilizuese në Evropë. Ai shtoi se Berlini është i gatshëm për negociata, por nuk do të tërhiqet për shkak të presionit apo kërcënimeve.

Incidenti në aeroportin “Leipzig/Halle” ndodhi më 4 gusht. Një dron me eksplozivë dhe mekanizëm shpërthimi u gjet në një zonë të sigurisë pranë avionëve ukrainas të mallrave.

Më vonë, një tjetër objekt fluturues i paidentifikuar u përplas me një avion mallrash të kompanisë DHL. Avioni nuk kishte mundur të ulej për shkak të mbylljes së pistës dhe u detyrua të ndërpriste procedurën e uljes.

Autoritetet gjermane ende nuk kanë përcaktuar zyrtarisht se kush qëndron pas incidentit, ndërsa dyshimet për përfshirjen e Rusisë kanë qarkulluar gjerësisht.

Kancelari gjerman Friedrich Merz ka deklaruar se hetimi është drejt përfundimit dhe se qeveria ka përcaktuar mënyrën e reagimit. Sipas tij, përgjigjja po koordinohet me aleatët e Gjermanisë në NATO dhe Bashkimin Evropian.

Wadephul pritet të udhëtojë në Irlandë për një takim me homologët e tij të Bashkimit Evropian.