VV fajëson BE-në për liberalizimin e vizave për serbët me pasaporta ilegale

Deputeti i Lëvizjes Vetëvendosje, Arbër Rexhaj, në një intervistë për Ekonomia Online  ka thënë se Këshilli i Bashkimit Evropian ka marrë vendimin për heqjen e vizave për qytetarët serbë të Kosovës, të cilët kanë pasaporta të Serbisë, pa u konsultuar me Kosovën.

Ai shtoi se ky vendim është arbitrar dhe është ndërhyrje e drejtpërdrejtë në sovranitetin e Kosovës.

“Kjo, në fakt, nuk është bërë në konsultim me Qeverinë e Kosovës. Fillimisht është vendosur në formë arbitrare, nuk janë dëgjuar dhe analizuar pra në terren të dhënat edhe analizat me aq sa unë kam informacion dhe e dyta, kjo është ndërhyrje e drejtpërdrejtë dhe minim në sovranitetin e Republikës së Kosovës”, ka thënë Rexhaj.

Rexhaj ka deklaruar se institucionet ndërkombëtare po kanë më shumë konsideratë për Serbinë se sa për Kosovën, e kjo po ndodh pavarësisht asaj se Serbia duket hapur se është pala jokonstruktive.

“Është e papranueshme, ne jemi shtet i pavarur dhe natyrisht kemi marrëdhënie bilaterale me BE-në dhe mendoj që në këtë kuptim edhe atëherë kur është biseduar, pala e Kosovës i ka dhënë arsyet e veta dhe në fakt kjo është vendosur në formë automatike të shpejtë dhe e ripërsërisë edhe një herë, duke e minu sovranitetin e Republikës së Kosovës”, ka thënë Rexha. “Tash Qeveria me institucionin ndërkombëtar do të bisedojë në kuptimin e dialogut, mirëpo ne shprehim indinjatën e thellë sepse përballë kërkesave të Serbisë BE-ja gjithmonë, sidomos kohëve të fundit, po duket sikur po e ledhaton Serbinë. Dhe, marrë parasysh se Serbia po është pala jokonstruktive në dialog, e cila po e sulmon Kosovën në aspektin e sovranitetit dhe të përfaqësimit ndërkombëtar, e në anën tjetër, mendoj që në këtë rast është dashur që ta themi në minimum të bashkëbisedimit të pyetet pra Kosova, sepse po merret një vendim për qytetarët e Kosovës, sepse pa dallim qytetarët serbë që jetojnë në Republikën tonë janë edhe qytetarë të Kosovës, pra janë kosovarë”, ka vijuar deputeti.

Në anën tjetër, deputeti i Aleancës për Ardhmërinë e Kosovës, Shemsedin Dreshaj, ka thënë se ky vendim nga Bashkimi Evropian është një alarm për Qeverinë.

“Ky është një vendim shumë i keq për Kosovën, në veçanti është vendim i keq edhe për Bashkimin Evropian, për shkak se praktikisht po e cenon sovranitetin e vendit duke u përzier në mënyrë flagrante drejtpërdrejt në dokumentet e udhëtimit jashtë vendit”, ka shtuar ai. /EO