Vrasësit të Lucies, kujdestari e përjetshme

Autori i vrasjes së vajzës 16 vjeçe, Lucie, që pati bërë jehonë të madhe në vitin 2009, është dënuar me mbikëqyrje (kujdestari) të përjetshme. Është ky vetëm rasti i dytë në Zvicër që shqiptohet një dënim i tillë, i cili është më i rëndi në këtë vend.

Vendimin e ka marrë Gjykata e lartë e Argaut, si instancë e dytë, duke plotësuar kështu  masën e ndëshkimit që ka kërkuar prokuroria.

Në muajin mars, Gjykata e Qarkut në Baden i kishte shqiptuar atij një dënim me burg të përjetshëm dhe masën e kujdestarisë që do të mund të rishqyrtohej dhe ndryshohej në çdo kohë. Pala paditëse nuk kishte qenë e kënaqur me këtë masë prandaj e kishte shtyrë lëndën më tutje, në Gjykatën e Lartë.

Masa e kujdestarisë së përjetshme nënkupton që te personi të cilit i shqiptohet ajo nuk ndikon kurrfarë terapie. Që nga pranimi i iniciativës së kujdestarisë (në vitin 2004) në Zvicër nuk kanë pushuar kontestimet ndaj këtij sanksioni.

Ka disa mbrojtës të të drejtave të njeriut që e kundërshtojnë masën e tillë kur ajo shqiptohet si e përjetshme.

Pala mbrojtëse ka paralajmëruar ankesë në Gjykatën Federale.