Vërshime dhe rreshqitje dheu në Zvicër

13 persona, në mesin e të cilëve edhe dy fëmijë është dashur të evakuoheshin me helikopter nga lugina e vërshuar. Dy të tjerë janë detyruar të kalojnë natën në makinën e tyre në një galeri

(KEYSTONE/Arno Balzarini)

Reshje të fuqishme shiu kanë shënuar mbrëmjen e të shtunës në disa regjione të Zvicrës. Në veçanti në Graubünden reshjet kanë shkaktuar dëme duke vërshuar vende-vende rrugët si në fshatin Val S-charl afër  Scuol-it, në regjionin Engadin. Pak para orës 20 policisë i kanë ardhur telefonata alarmuese nga qytetarët për vërshime në fshatin e përmendur, shkruan srf.ch.

13 persona, në mesin e të cilëve edhe dy fëmijë është dashur të evakuoheshin me helikopter nga lugina e vërshuar, trasnmeton albinfo.ch. Dy të tjerë janë detyruar të kalojnë natën në makinën e tyre në një galeri.

Edhe rreth 50 persona të tjerë ndodheshin në Val S-charl gjatë orëve të stuhisë që shkaktoi vërshime. Ata do të transportoheshin gjatë ditës me helikopter duke u sjellë në siguri, thuhet në njoftimin e policisë.

Një numër rrugësh lokale dhe shtigjesh për këmbësorë janë bllokuar.

Ndërsa në Flüelapass  po ashtu në Graubünden njoftohet për një rrëshqitje dheu të shkaktuar nga shirat e fuqishëm. Për pasojë, ka pësuar lëndime një grua në një motoçikletë, të cilën e ka goditur në shpatulla një pjesë guri që kishte rënë nga shkëmbi.