Vera e mërgatës në Viti: Zbulohet programi i “Ditëve të Diasporës 2026”

Vitia do të mirëpresë bashkatdhetarët gjatë verës me një kalendar të pasur aktivitetesh në kuadër të manifestimit tradicional “Ditët e Diasporës 2026”, i cili do të shtrihet nga 23 korriku deri më 29 gusht. Manifestimi synon të forcojë lidhjet me mërgatën dhe të promovojë kulturën, traditat dhe jetën shoqërore të komunës, shkruan albinfo.ch.

Sipas agjendës së publikuar nga Drejtoria për Kulturë, Rini dhe Sport e Komunës së Vitisë, aktivitetet nisin më 23–25 korrik me Festivalin Ndërkombëtar të Muzikës Elektronike “Nexus”, që do të mbahet në Kabash (Restaurant Arena), duke filluar nga ora 16:00.

Më 30 korrik, në fshatin Debelldeh do të inaugurohen shkronjat monumentale të UÇK-së, në një ceremoni që nis në orën 19:30.

Ndërkaq, më 31 korrik dhe 1 gusht, në sheshin e qytetit do të zhvillohet festivali ndërkombëtar “N’Karadak Krisin Tupanat”, me fillim nga ora 20:30.

Në datat 1 dhe 2 gusht, qyteti do të jetë gjithashtu nikoqir i panairit “Ti Ruajmë Vlerat Tona Tradicionale”, ndërsa më 2 gusht do të luhet finalja e turnirit memorial “Milaim Tahiri” në Gërmovë, duke filluar në orën 20:00.

Programi vazhdon më 14 dhe 15 gusht me festivalin ndërkombëtar “Folk Fest Anamorava 2026”, që do të mbahet në sheshin e qytetit nga ora 20:00.

Manifestimi do të përmbyllet me Samitin Botëror të Rinisë, i planifikuar nga 25 deri më 29 gusht në Viti.

Përmes këtij programi të larmishëm, Komuna e Vitisë synon të krijojë një atmosferë festive për bashkatdhetarët që kalojnë pushimet verore në vendlindje, duke i bërë ata pjesë të jetës kulturore, sportive dhe shoqërore të qytetit.