Vdekja e shqiptarit paralizon Brukselin

Punonjësit e transporit publik në Bruksel kanë hyrë në grevë pasi një inspektor shqiptar i transportit u rrah për vdekje

Qeveria belge ka njoftuar punonjësit e transportit publik, të cilët po bëjnë  grevë, se 400 policë shtesë do të angazhohen në Bruksel pasi një inspektor transporti është rrahur për vdekje.

Bëhet fjalë për Iliaz Tahiraj, 56 vjeç me origjinë shqiptare, që punonte prej 29 vitesh në rrjetin e transportit, STIB.

Incidenti i ndodhur ditën e shtunë shkaktoi mbylljen e metrosë dhe rrjetit të autobusëve, të cilët kanë mbetur të paralizuar edhe gjatë së martës.

Inspektori shqiptar u sulmua në vendin ku ishte përplasur një makinë dhe një autobus dhe humbi jetën nga goditjet e marra në kokë. Personi i dyshuar si autor i vrasjes është arrestuar.

28-vjeçari, ishte një udhtar në makinën që është përplasur dhe e goditi inspektorin në fytyrë duke e përplasur në tokë. Ai vdiq më vonë në spital.

Zyra e prokurorit të Brukselit, duke iu referuar deklaratave të dëshmitarëve dhe vetë autorit, njofton se inspektori u godit nga një grusht i vetëm.

Qindra kolegë të tij marshuan të irrituar në qendrën e Brukselit ditën e hënë në shenjë proteste ndaj vdekjes së Tahirajt, njofton TCH.

Njoftimi për masa shtesë sigurie erdhi pas bisedimeve të së hënës mes autoriteteve federale, menaxherëve të rrjetit STIB.