Vazhdojnë të bien çmimet e banesave me qira

Foto ilustrim

Lajme të mira po vijnë për qiramarrësit në Zvicër. Aktualisht, qiratë raportohet të jenë 0.5 për qind më të ulëta se në muajin e kaluar. Kjo është treguar nga indeksi i Pasurive të Patundshme të ImmoScout24 dhe nga kompania e konsulencës për pasuritë e paluajtshme IAZI. Për herë të katërt me radhë, pronarët zbresin normat e qirasë, shkruan albinfo.ch.

Mesatarisht, një apartament prej 100 metrash katrorë në Zvicër aktualisht kushton 2165 franga në muaj.

Por, në varësi të vendit, tregojnë qartë dallimet e çmimeve: deri tani më e larta janë qiratë në rajonin e Cyrihut, ku për një muaj një apartament i këtillë kushton 2,610 franga (0,1 për qind). Pastaj vjen Gjeneva (-0.6 për qind), Zvicra Qendrore (+0.9 për qind), Zvicra Veri-Perëndimore (-0.1 për qind) dhe Plateau Qendrore (+0.1 për qind). Janë veçanërisht të favorshme çmimet në Ticino, 1894 franga (-1.1 për qind).

“Nëse çmimet zbresin ose rriten, varet kryesisht nga kërkesat për apartamente”, thotë Martin Waeber, drejtor i ImmoScout24.

Nëse ka më pak hapësira për banim, çmimet rriten. Nga ana tjetër, nëse shumë apartamente mbeten të zbrazëta, atëherë qiramarrësit paguajnë më pak.