Vazhdojnë deklaratat përfundimtare në gjykimin ndaj ish-krerëve të UÇK-së në Hagë

Faza përfundimtare e gjykimit ndaj Thaçit, Veselit, Krasniqit dhe Selimit vazhdon sot

Në Dhomat e Specializuara të Kosovës në Hagë po vazhdojnë deklaratat përfundimtare të Zyrës së Prokurorit të Specializuar (ZPS) në procesin gjyqësor ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, përcjell albinfo.ch.

Seanca e dytë e fazës përfundimtare të këtij gjykimi pritet të nisë në orën 09:00. Gjatë seancës së fundit, prokuroria prezantoi deklarata që lidhen me funksionimin dhe strukturën e Shtabit të Përgjithshëm të UÇK-së.

Zyra e Prokurorit të Specializuar ka kërkuar që katër të akuzuarit të dënohen me nga 45 vjet burgim secili. Sipas prokurorisë, gjatë seancës së sotme do të paraqiten përgjegjësitë penale të të akuzuarve, ndërsa në fund pritet fjala përmbyllëse e prokurores së specializuar, Kimberly West.

Në këtë fazë përfundimtare, prokuroria, ekipet mbrojtëse dhe vetë të akuzuarit kanë mundësinë e fundit për të paraqitur argumentet e tyre para trupit gjykues. Ish-krerët e UÇK-së i kanë cilësuar akuzat si të pabazuara, ndërsa mbrojtja ka argumentuar se UÇK-ja nuk kishte një strukturë të organizuar komanduese.

Thaçi, Veseli, Krasniqi dhe Selimi ndodhen në paraburgim në Hagë që nga nëntori i vitit 2020, ndërsa procesi gjyqësor ndaj tyre ka nisur më 3 prill 2023, gati tre vjet pas konfirmimit të aktakuzës.

Dhomat e Specializuara janë pjesë e sistemit gjyqësor të Kosovës, por funksionojnë me personel ndërkombëtar dhe janë të vendosura në Hagë, Holandë. Kjo gjykatë financohet kryesisht nga Bashkimi Evropian dhe është themeluar në vitin 2015 nga Kuvendi i Kosovës, pas kërkesës së bashkësisë ndërkombëtare. /Albinfo.ch

---