Vaud lejon festimet me bori pas fitoreve të Zvicrës në Kupën e Botës, por me kufizime

Policia kantonale do të tolerojë kolonat e automjeteve dhe përdorimin e borive vetëm për një periudhë të kufizuar pas ndeshjeve të kombëtares zvicerane

Autoritetet në kantonin Vaud kanë njoftuar se do të lejojnë festimet e tifozëve në rast të fitoreve të kombëtares së Zvicrës gjatë Kupës së Botës FIFA që do të zhvillohet në Shtetet e Bashkuara të Amerikës, përcjell albinfo.ch.

Sipas policisë kantonale, tifozët do të mund të organizojnë kolona automjetesh dhe të përdorin boritë për të festuar sukseset e përfaqësueses zvicerane, por vetëm brenda një afati të kufizuar prej 60 minutash pas përfundimit të ndeshjes.

Autoritetet kanë theksuar se festimet nuk duhet të zgjasin më shumë se një orë dhe se aktivitetet pas orës 22:00 nuk rekomandohen, me qëllim që të mos shqetësohet qetësia e banorëve gjatë natës.

Policia u ka bërë thirrje tifozëve që të festojnë me përgjegjësi dhe respekt ndaj qytetarëve të tjerë, duke ruajtur rendin publik dhe qetësinë në zonat e banuara.

Masa synon të balancojë entuziazmin sportiv me nevojën për respektimin e rregullave të bashkëjetesës dhe pushimit të natës në kanton. /Albinfo.ch

---