Varfëria në Gjermania ka arritur nivelin më të lartë që nga fillimi i regjistrimeve të krahasueshme në vitin 2020, sipas një raporti të publikuar nga një grup ombrellë i organizatave bamirëse, Paritätischer Wohlfahrtsverband, përcjell albinfo.ch.
Sipas të dhënave të bazuara në Zyrën Federale të Statistikave të Gjermanisë, rreth 13.34 milionë njerëz, ose 16.1% e popullsisë, kanë jetuar në varfëri gjatë vitit 2025. Kjo shifër shënon rritje nga 15.5% një vit më parë.
Raporti thekson se numri i personave në varfëri është rritur me rreth 1.2 milionë që nga niveli më i ulët i regjistruar në vitin 2023, duke e përshkruar situatën si “afër një krize sociale”.
Drejtori menaxhues Joachim Rock i ka bërë thirrje qeverisë gjermane që të mos shkurtojë përfitimet sociale, duke paralajmëruar se çdo reduktim i mëtejshëm mund ta përkeqësojë situatën ekzistuese.
Sipas raportit, grupet më të prekura mbeten prindërit e vetëm dhe personat që jetojnë vetëm, ndërsa shkalla e varfërisë është mbi mesataren edhe tek të rinjtë e moshës 18–25 vjeç dhe tek personat mbi 65 vjeç.
Po ashtu, raporti evidenton pabarazi të theksuara rajonale, ku në shtetet më të pasura si Bavaria dhe Baden-Württemberg niveli i varfërisë është rreth një në tetë persona, ndërsa në rajone si Saksoni-Anhalt dhe Bremen shifrat janë dukshëm më të larta.
Sipas përkufizimit të Bashkimit Evropian, një person konsiderohet në rrezik varfërie nëse të ardhurat janë nën 60% të mesatares kombëtare, që në vitin 2025 ishte rreth 1,445 euro në muaj për një person të vetëm./Albinfo.ch
