U dorëzua peticioni për mos ekstradimin e Shemsi Nuhiut në Serbi

Peticionin, në departamentin që drejton ministrja Sommaruga e kanë dorëzuar Jeton Kryeziu dhe Avni Binaku

Ashtu siç ishte paralajmëruar, sot pikërisht në orën 15.00, komiteti për kundërshtimin e ekstradimit të S. Nuihiut në duart e organeve serbe, ua ka dorëzuar peticionin autoriteteve përgjegjëse të Ministrisë së Drejtësisë në Bernë.

Është fjala për një peticion të nënshkruar nga 5152 persona, shqiptarë dhe të tjerë, në Zvicër.

Peticionin e ka marrë në dorëzim përgjegjësja për informim në departamentin e drejtësisë dhe policisë, Christine Stähli.

Sipas kryesuesve të komitetit, Jeton Kryeziu dhe Avni Binaku, dorëzimi i nënshkrimeve me peticionin, paraqet një sukses për iniciuesit e peticionit, sepse përmes tij shtohen gjasat që të ndryshohet vendimi për ekstradimin e Shemsi Nuhiut te organet e Serbisë. 

“Ende nuk dihet se sa do të zgjasë shqyrtimi i peticionit, por është me rëndësi se me peticionin kemi arritur t’i bindim autoritetet zvicerane të drejtësisë për ta shqyrtuar vendimin për mos ekstradimin e Shemsi Nuhiut në Serbi”, ka thënë pas dorëzimit të peticionit, kryesuesi i Komitetit kundër ekstradimin e Shemsi Nuhiut në Serbi, avokati Jeton Kryeziu. 

Vëllai i Shemsi Nuhiut, Sherif Nuhiu, i cili mori pjesë në dorëzimin e peticionit në Bernë, ka thënë për albinfo.ch se me këtë po shtohen gjasat për mos ekstradimin e vëllait të tij në Serbi. Ai ka falënderuar komitetin për angazhimin e tyre në senzibilizimin e opinionit zviceran për mos dorëzimin e Shemsi Nuhiut në Serbi.

Komiteti: Shaban Kozhani, Avni Binaku, Skender Thaci, Jeton Kryeziu

Përfaqësues të Komitetit me dy vëllezërit e Shemsi Nuhiut