Treni mbyt ujkun në zonë të banuar

Një ujk është shkelur nga treni dhe për pasojë është mbytur, në binarët e trenit në një zonë urbane, fare afër hapësirës së banuar

Ujqit janë bërë kohëve të fundit temë e shpeshtë në opinionin zviceran. Mungesa e tyre për një kohë të gjatë, pastaj kthimi i sërishëm në malet e Zvicrës, kryesisht përmes kufirit me Italinë, sulmet që ata herë pas herë u kanë bërë kopeve të deleve etj. janë tematizuar mjaft në mediet e këtushme.

Dhe në varësi nga paraqitjet ose dëmet që kanë shkaktuar, ka qenë edhe reagimi i segmenteve të shoqërisë zvicerane për ose kundër të drejtës për t`i vrarë ujqit dëmtues.

Ajo që ka ndodhur dje në Schlieren të Cyrihut ka qenë deri tash diçka e paimagjinueshme treni: një ujk është shkelur nga treni dhe për pasojë është mbytur, në binarët e trenit në një zonë urbane, fare afër hapësirës së banuar. Zyrtarët e Cyrihut ende nuk kane përgjigje se si ka mundur të ndodhë që ujku të vijë në këtë zonë. Madje është kjo hera e parë që një ujk është parë në përgjithësi në kantonin e Cyrihut. Kontrollimi gjenetik që do t`i bëhet, pritet të tregojë se prej nga ka ardhur ky ujk në këtë zonë.

Në të njëjtën kohë kur ujku “ka rënë në qytet”, Dhoma e Kantoneve e Parlamentit të Zvicrës ka debatuar dhe votuar për uljen e masave mbrojtëse për ujqit. Një mocion i deputetit të CVP/PDC-së, Stefan Engler ka kërkuar që mbrojtja e ujqve nga ligji të vihet në nivel të barabartë me mbrojtjen e interesave të bujqësisë, gjuetisë dhe turizmit. Kjo do të mundësonte që për një regjin të caktuar të përcaktohej një numër i caktuar i lejuar i ujqve.

Sipas ligjit në fuqi një ujk mund të mbytet në varësi të numrit të deleve që ka mbytur ose në rast se rrezikon jetë e njerëzve.