“The Irish Times”: Shqipëria, më shumë se thjesht “Maldivet e Evropës”

Gazeta prestigjioze irlandeze “The Irish Times” i ka kushtuar një artikull të gjatë Shqipërisë, duke e përshkruar si një destinacion magjepsës që ofron shumë më tepër se bregdeti i Ksamilit, tashmë i njohur në rrjetet sociale si “Maldivet e Evropës”.

Në reportazhin e saj, gazetarja Aoife McElwain rrëfen përvojën personale në qytetin e Krujës, Tiranë dhe zonat turistike jugore e veriore të vendit, duke vënë në pah historinë e pasur, mikpritjen shqiptare, ushqimin tradicional dhe peizazhet mahnitëse, transmeton albinfo.ch.

Shkrimi veçon Pazarin e Vjetër të Krujës, ku autorja përshkruan tregtarë të sjellshëm dhe punime artizanale me çmime të përballueshme. Tirana përmendet për ndërthurjen e saj mes historisë komuniste dhe jetës moderne, me destinacione si Bunk’Art, Dajti Ekspres dhe kafenetë e stilit evropian.

Shqipëria përshkruhet si një vend me trashëgimi të thellë historike, që ka kaluar nga izolimi komunist në një demokraci të re, me njerëz të hapur dhe një kulturë që e reflekton këtë transformim. Po ashtu, artikulli përshkruan bukuritë natyrore të Alpeve Shqiptare, rezervuarin e Bovillës, qytetin e Beratit, dhe plazhet e pastërta të Dhërmiut.

Në fund, autorja sugjeron Shqipërinë si një destinacion për këdo që kërkon përzierjen e aventurës, ushqimit të mirë, mikpritjes dhe historisë unike të Ballkanit.