Temperaturat kalojnë 36 gradë në Zvicër

Bazeli dhe Neuchâteli regjistrojnë temperaturat më të larta të vitit, ndërsa autoritetet paralajmërojnë rrezik për shëndetin

Vala e të nxehtit në Zvicër është intensifikuar edhe më tej, me temperaturat që kanë kaluar për herë të parë këtë vit pragun e 36 gradëve Celsius. Vlerat më të larta u regjistruan në Bazel, ku termometri arriti deri në 36.6°C, ndërsa në Neuchâtel u matën 36.2°C, transmeton albinfo.ch.

Për shkak të temperaturave ekstreme, shërbimi meteorologjik zviceran MeteoSwiss ka ngritur paralajmërimin për vapën në nivelin 4, që konsiderohet nivel i lartë rreziku. Alarmi përfshin një pjesë të madhe të Zvicrës perëndimore, rajonin e Liqenit të Gjenevës dhe Valaisin qendror.

Autoritetet shëndetësore paralajmërojnë se mungesa e freskimit gjatë natës po rrit rrezikun e problemeve shëndetësore të lidhura me vapën, veçanërisht për të moshuarit, fëmijët dhe personat me sëmundje kronike. Në disa zona, temperaturat mbeten të larta edhe gjatë orëve të natës, duke e vështirësuar rikuperimin e organizmit.

Ndërkohë, vala e të nxehtit po ndikon edhe në jetën e përditshme. Disa shkolla kanë anuluar aktivitetet në ambiente të hapura në fund të vitit shkollor, ndërsa sindikatat e mësuesve po kërkojnë masa shtesë për mbrojtjen e nxënësve dhe stafit arsimor.

---