“Ta thyejmë heshtjen” – në Gjenevë mbahet një mbrëmje diskutimi për dhunën në familje

Në Gjenevë, më 6 maj 2026, organizohet një mbrëmje diskutimi që i kushtohet trajtimit të dhunës shtëpiake, me fokus te mënyrat konkrete të ndërhyrjes dhe mbështetjes.

Aktiviteti zhvillohet nga ora 18:30 deri në 21:00 në Espace de Quartier Le 99 dhe sjell në një panel të përbashkët profesioniste nga fusha e shëndetit mendor, juridikut dhe punës sociale. Diskutimi do të trajtojë parandalimin, reagimin institucional dhe individual, si dhe qasjen në shërbimet ekzistuese për personat e prekur.

Në panel marrin pjesë Shqipe Shehu Brovina, psikiatre dhe psikoterapeute, Linda Rexhaj Maliqi, juriste, si dhe Rrezarta Sejdiu Shatri, punëtore sociale, të cilat do të trajtojnë çështjet e rrezikut, mbrojtjes dhe ndërhyrjes nga perspektiva profesionale.

Takimi është i hapur për publikun dhe synon të krijojë një hapësirë informimi dhe orientimi praktik për çështje që shpesh mbeten jashtë diskutimit publik. Hyrja është e lirë, ndërsa rezervimi duhet të bëhet paraprakisht në adresën elektronike [email protected], për shkak të kapacitetit të kufizuar.