“Suva” humb mbi 5 milionë franga, fajëson ndalimin e angazhimit të detektivëve

Me angazhimin e detektivëve, kur kjo ka qenë e lejuar, Suva thotë se kishte arritur të kursente deri në gjysmë milioni franga për një rast të dyshuar

Sigurimi Zviceran për raste të Aksidenteve, Suva, gjatë vitit të kaluar, ka arritur të parandalojë përfitimet e pamerituara mbi bazë aksidentesh në një shumë prej 12.5 milionë frangash. Kjo, sipas asaj që thotë Suva, është për 5.5 milionë franga më pak se një vit më parë, shrkruan srf.ch.

Më interesantja këtu është se sipas sigurimit në fjalë “fajet” i ka heqja dorë nga shfrytëzimi i detektivëve, transmeton albinfo.ch.

Siç është shkruar tashmë shumë herë, një vendim që para një viti kishte marrë Gjykata Evropiane për të Drejtat e Njeriut me seli në Strasburg, kishte shpallur të paligjshëm angazhimin e detektivëve për përgjimin e rasteve të dyshuara për simulim.

Me fillimin e zbatimit të këtij vendimi, Suva ka humbur shumë, thuhet në komunikatën e saj për medie, transmeton albinfo.ch. Me angazhimin e detektivëve, kur kjo ka qenë e lejuar, Suva kishte arritur të kursente deri në gjysmë milioni franga për një rast të dyshuar.

Rezervat dhe rezistenca që qarqe të ndryshme kanë bërë kundër vendimit të Strasburgut ka bërë që çështja të rishikohet. Kështu, të hënën e ardhshme Dhoma Nacionale e Parlamentit të Zvicrës do të debatojë lidhur me nxjerrjen e një projektligji i cili do të lejonte sërish angazhimin e detektivëve.