Studim: Zviceranët nuk heqin dorë nga kodi i veshjes në punë

@pixabay

Edhe gjatë valëve të të nxehtit, shumica e zviceranëve vazhdojnë të respektojnë kodin tradicional të veshjes në vendin e punës. Sipas një studimi të institutit YouGov, të realizuar për platformën Galaxus, vetëm 27 për qind e burrave në Zvicër veshin pantallona të shkurtra në punë, ndërsa 60 për qind zgjedhin pantallona të gjata.

Studimi, i kryer me 2.616 pjesëmarrës nga Zvicra, Gjermania, Austria, Italia dhe Franca, tregon se Zvicra ka kodin më të rreptë të veshjes në ambientet profesionale. Shumica e të anketuarve i konsiderojnë të papërshtatshme bluzat që zbulojnë barkun, kostumet sportive, si dhe shapkët apo sandalet në zyrë, veçanërisht kur ka kontakt me klientët.

Në krahasim me Zvicrën, Gjermania rezulton vendi më liberal për sa i përket veshjes në punë, ku pantallonat e shkurtra dhe bluzat me mëngë të shkurtra janë shumë më të zakonshme.