Studim i ri zbulon pse zjarrfikësit profesionistë në Zvicër po largohen nga profesioni

Lake Zurich Fire Rescue Department, FB

Një studim i ri në Zvicër ka hedhur dritë mbi arsyet pse një numër gjithnjë e më i madh i zjarrfikësve profesionistë po largohen nga puna ose po ndryshojnë karrierë, shpesh përpara moshës së pensionimit, transmeton albinfo.ch.

Zjarrfikësit profesionistë janë ndër reaguesit e parë në raste emergjencash, aksidentesh, zjarresh dhe fatkeqësish natyrore. Puna e tyre kërkon reagim të menjëhershëm, përgatitje fizike të lartë dhe përballje të vazhdueshme me stres ekstrem. Sipas përfaqësuesve sindikalë, deri më tani mungonin të dhënat konkrete mbi largimet nga ky profesion, ndërsa informacionet ishin kryesisht të fragmentuara.

Studimi, i realizuar nga Universiteti i Shkencave të Aplikuara dhe Arteve i Zvicrës Veriperëndimore (FHNW), tregon se mosha e daljes në pension ndryshon ndjeshëm, duke filluar nga 60 deri në 65 vjeç, në varësi të qytetit dhe kushteve të punës. Kjo mospërputhje ka nxitur debat mbi përshtatshmërinë e moshës zyrtare të pensionit për këtë profesion fizikisht të rëndë.

Sindikata VPOD vlerëson se pensionimi në moshën 65 vjeç është shumë i vonë për zjarrfikësit profesionistë dhe kërkon zgjidhje sektoriale për pensionim të parakohshëm, të ngjashme me profesionet e tjera me konsum të lartë fizik. Qëllimi, sipas tyre, është që punonjësit të hyjnë në fazën e tretë të jetës me shëndet sa më të mirë.

Nga ana tjetër, Shoqata e Zjarrfikësve Profesionistë thekson se presioni kohor dhe natyra e operacioneve e bëjnë të vështirë lehtësimin e barrës individuale gjatë ndërhyrjeve. Për më tepër, mungesa e një sistemi të unifikuar pensionimi lidhet me faktin se zjarrfikësit punësohen nga komuna të ndryshme, çka kërkon zgjidhje politike lokale.

Studimi vëren gjithashtu një rritje të dorëheqjeve në mesin e karrierës, pra te zjarrfikës që kanë ende vite pune përpara. Arsyet përfshijnë probleme shëndetësore, mungesë perspektive për avancim, kalim në sektorin privat ose transferim në shërbime të tjera zjarrfikëse.

Si masa afatshkurtra, autorët e studimit sugjerojnë ndryshime organizative, si heqja e rregullave të banimit të detyrueshëm pranë vendit të punës dhe ofrimi i modeleve fleksibile të punës, përfshirë oraret me kohë të pjesshme. Sindikata ka paralajmëruar se do të hapë dialog me autoritetet dhe shërbimet zjarrfikëse, me fokus të veçantë çështjen e pensionimeve.