Sot në Kosovë priten temperatura deri në 38°C

Kushtet atmosferike do të përmirësohen gradualisht në pjesën e dytë të javës, me temperatura më të ulëta dhe mot më të favorshëm.

Sipas një njoftimi të bërë nga Instituti Hidrometeorologjik i Kosovës java e fundit e qershorit dhe fillimi i korrikut do të karakterizohen nga mot fillimisht shumë i nxehtë, ndërsa nga mesi i javës pritet një ndryshim i kushteve atmosferike.

Parashikimi thotë se e hëna (dita e sotme) do të jetë dita më e nxehtë e javës, shkruan rtklive.com. Moti do të jetë kryesisht me diell dhe vranësira të pjesërishme, ndërsa temperaturat maksimale do të arrijnë nga 32 deri në 38 gradë Celsius. Temperaturat minimale do të lëvizin ndërmjet 15 dhe 18 gradë Celsius, ndërsa era do të fryjë nga veriperëndimi me shpejtësi 1 deri në 5 metra në sekondë.

Nga mesi i javës pritet depërtimi i një mase ajrore më të freskët nga veriperëndimi i kontinentit, e cila do të sjellë ulje të ndjeshme të temperaturave, shtim të paqëndrueshmërisë atmosferike dhe reshje lokale shiu, të shoqëruara me shkarkime rrufesh.

IHMK bën të ditur se, ndonëse fillimi i javës në Kosovë do të jetë shumë i nxehtë, kushtet atmosferike do të përmirësohen gradualisht në pjesën e dytë të javës, me temperatura më të ulëta dhe mot më të favorshëm.

 

---