Skandali me diploma false në Maqedoni

Tre kallëzime penale janë ngritur për punësime me diploma të falsifikuara në Maqedoni.

Sipas Sektori për Punë të Brendshme në Kumanovë, nën hetim është personi M.M. 47 vjeç nga Kumanova, i dyshuar për përdorim të dokumentit me të dhëna të pavërteta dhe për B.R. 46 vjeç e V.M. 58 vjeç nga Shkupi, të dyshuar për falsifikim të dokumenteve zyrtare, si edhe A.I. 37 vjeç nga Shtipi, i dyshuar për keqpërdorim të kompetencave dhe pozitës zyrtare, shkruan “RTV 21”.

“I dyshuari B.R. si i punësuar në Universitetin FON, ka falsifikuar të dhëna për personin M.M. gjoja se ka dhënë provime, duke i mundësuar kështu që të marrë diplomë universitare, të cilit i ka ndihmuar për punësim si kryeinspektor në departamentin për të huaj dhe për kthim në Qendrën rajonale për punë kufitare “Veri”. Kjo diplomë është përdorur për vazhdimin e studimeve të ciklit të dytë, ku B.R. sërish ka bërë falsifikime tjera. Edhe këtë diplomë, M.M. e ka përdorur në punën e tij në Ministrinë e Punëve të Brendshme”, nga Ministria e Punëve të Brendshme, përcjell albinfo.ch.

Zëvendësministri i Arsimit, Arbër Ademi për dëmet e shkaktuara në sistemin edukativo-arsimor, duke filluar nga parashkollorët e deri tek universitetet, gishtin e drejton nga stafi joadekuat. Ai thotë se Inspektorati Shtetëror i Arsimit duhet të marrë masa që të verifikojë të gjitha diplomat e dyshimta të mësimdhënësve.

Sipas të dhënave të policisë, personi M.M. për tre vjet rresht me diplomat false ka ligjëruar si profesor në Universitetin e Shën Nikollës, duke përfituar 272.300 denarë.

Ai me diplomë false ka regjistruar studimet pos-diplomike në Fakultetin për biznes tek “Euro College” në Kumanovë, pastaj doktoratën në Universitetin për turizëm dhe hotelieri në Ohër, dhe ka dhënë provimin gjyqësor në Ministrinë e Drejtësisë, për t’i përdorur kotë tituj për punësim në MPB.