Shumica e zviceranëve përkrahin marrëveshjen tatimore

Marrëveshjen, e cila ka mundësi që në muajin nëntor të hidhet në referendum, e kundërshtojnë vetëm 21.1% të të anketuarve

Shumica e zviceranëve, gjegjësisht 69.8% të tyre janë në favor të marrëveshjes tatimore në mes të Zvicrës dhe Gjermanisë. Ky rezultat është nxjerrë nga një sondazh që e ka bërë instituti për hulumtimin e opinionit publik Isopublic me porosi të gazetës “SonntagsZeitung”.

Marrëveshjen, e cila ka mundësi që në muajin nëntor të hidhet në referendum, e kundërshtojnë vetëm 21.1% të të anketuarve.

Është interesante se përkrahësit e marrëveshjes gjenden në të gjitha partitë. Kështu në taborrin e SVP-UDC, janë 56% që e përkrahin marrëveshjen e përmendur. Më shumë të tillë ka në SP-PS, 70.8%, ndërsa më së shumti ithtarë të marrëveshjes tatimore Zvicër-Gjermani ka në gjirin e partisë CVP-PDC, 89.4%. Po ashtu ehde FDP-PLR ka një përqindje impresionuese, prej 79.1%.

Një element të ri që e ka zbuluar sondazhi ka të bëjë me qëndrimin e zviceranëve lidhur me sekretin bankar. 59.4 për qind të të anketuarve janë shprehur për zbutjen e rregullave për mbajtjen e këtij sekreti në rastet e dyshimit për evazion të rëndë fiskal.

Për këtë studim janë anketuar 1010 shtetas zviceranë me të drejtë vote.