Shqipëria siguron 3 milionë vaksina anti-Covid

@pixabay

Mësohet se mbi 1 milion qytetarë të Shqipërisë i kanë kryer të dyja dozat e vaksinës, ndërsa mbi 110 mijë qytetarë janë vaksinuar me tri doza, tha ministrja e Shëndetësisë e Shqipërisë, Ogerta Manastirliu, në fjalën e saj në Kuvend.

“Kemi mbërritur në gati 50% të qytetarëve mbi 16 vjeç të vaksinuar me një dhe dy doza. Prej fillimit të vaksinimit janë kryer 2.253.886 vaksinime. Mbi 1 milion qytetarë janë vaksinuar me dy doza, ndërsa mbi 124 mijë kanë marrë dozën e tretë të vaksinës anti-COVID”, ka thënë ajo, raporton TCH.

Sipas ministres, deri në fund të dhjetorit do të jenë siguruar gjithsej tre milionë doza nga vaksina të kompanive të ndryshme.

“Pak ditë më parë mbërritën mbi 100 mijë doza të vaksinës ‘Pfizer’, ndërsa priten së afërmi edhe 375 mijë doza vaksine përmes mbështetjes së Bashkimit Evropian për të arritur në 3 milionë doza deri në mbyllje të këtij viti. Siç presim të kemi sasinë e parë të vaksinave ‘Johnson&Johnson’ nga ‘Covax’-i”, tha ministrja e Shëndetësisë e Shqipërisë.

Ajo shtoi se Qeveria shqiptare ka siguruar gjithashtu një kontratë të re me “Pfizer”-in prej 1.5 milion dozash dhe do të vijojë edhe më tej furnizimin me vaksina të tjera.

“Po kështu jemi duke vlerësuar në dinamikë situatën dhe në ndërkohë po vijojmë me investimet në sektorin shëndetësor për të siguruar Planin e Dimrit, si dhe vazhdimit të rritjes së kapaciteteve, qoftë sa i përket testimit dhe gjurmimit me shtimin e aparaturave të reja në ISHP, duke fuqizuar Urgjencën Kombëtare, ku një flotë e re prej 20 autoambulancash do të bëhet efektive brenda këtij viti, duke mundësuar rritjen e përgjigjes ndaj rasteve urgjente, si dhe kapacitetet spitalore, ku bëjmë të mundur edhe fillimin e investimit në spitalin infektiv, mbi 4 milionë euro për ta fuqizuar e për ta bërë një spital modern dhe qendër ekselence të sëmundjeve infektive”, theksoi ministrja e Shëndetësisë e Shqipërisë, Ogerta Manastirliu.