Shkollat e Cyrihut braktisin «shkronjat e dorës»

Në vend të "shkronjave të shkrimit" (ose të dorës) si mjet për shkrimin me dorë të nxënësve do të shërbejë i ashtuquajtur «shkrimi bazik». Bëhet fjalë për modelin e shkrimit me «shkronja të shtypit»

Të gjithëve na kujtohet ajo thënia e mësueses nga klasa e parë: «A e madhe e shkrimit, a e vogël e shkrimit». Eh pra «germat e shkrimit», apo  «të dorës», ato të lidhura varg apo sido që të quhen, nga viti i ardhshëm shkollor nuk do të kenë më vend në shkollat e Kantonit të Cyrihut.

Duke vendosur për heqjen e «shkronjave të dorës», këshilli Arsimor i Kantonit të Cyrihut ka ndjekur rekomandimin e autoriteteve arsimore në nivel të kantoneve gjermanishtfolëse të Zvicrës.

Sipas njoftimit që ka bërë sot këshilli në fjalë, zbatimi i plotë i vendimit do të përfundojë në vitin shkollor 2018-2019, shkruajnë mediet zvicerane. Dhe në vend të shkronjave të shkrimit, si mjet për shkrimin me dorë të nxënësve do të shërbejë i ashtuquajtur «shkrimi bazik». Bëhet fjalë për modelin e shkrimit me «shkronja të shtypit». Ai është një shkrim më i qartë, pa leqe e dredha dhe mundëson të shkruhet në mënyrë më efikase dhe të shpejtë, transmeton albinfo.ch. Te ky model nuk duhen lidhur shkronjat njëra me tjetrën.

Enti i mjeteve mësimore i Cyrihut aktualisht është duke i përpunuar fletoret e shkrimit «ABC» 1,2 dhe 3., të cilat në të ardhmen do të jenë në dispozicion vetëm me shkronjat bazike.

Konferenca e drejtorëve kantonalë të arsimit për zonën gjermanishtfolëse të Zvicrës (D-EDK) më 31 tetor 2014 u kishte rekomanduar kantoneve ne fjalë kalimin nga shkronjat e shkrimit në shkrimin bazik.

Duhet thënë se Kantoni i Lucernit është duke e aplikuar që nga viti 2010 modelin e shkrimit bazik dhe ai po rezulton i suksesshëm. Edhe Kantoni i Cyrihut pritet të ndjekë modelin e Lucernit.