Shkallë rekorde e cyber-krimeve në Zvicër

Gjatë vitit 2014 në këtë qendër janë paraqitur 10.214 veta. Ky numër përbën një rritje prej 10.9 për qind

Krimi nga interneti në Zvicër po shënon rekorde. Më së shumti viktima të këtij lloji të ri të krimit gjegjësisht mashtrimit bëhen përmes sulmeve të hakerëve. Lidhur me këto sulme viktimat mund të drejtohen online në qendrën koordinuese për luftimin e krimit përmes internetit (KOBIK).

Gjatë vitit 2014 në këtë qendër janë paraqitur 10.214 veta, bëhet e ditur në raportin vjetor të kësaj qendre. Ky numër përbën një rritje prej 10.9 për qind në krahasim me një vit më parë. Tashmë dy të tretat e njoftimeve kanë të bëjnë me përpjekjet për mashtrim. Sa për krahasim: në vitin 2009 ato përbënin vetëm 10%.

Më së shumti në shënjestër të kriminelëve të internetit është qarkullimi me e-mail gjegjësisht shkëmbimi i të dhënave që keqpërdoren për qëllime të ulëta.

Po ashtu është ne trend krimi përmes të dhënave të vjedhura me informacione mbi mënyrat e pagesave. Dëmi i shkaktuar në këtë mënyrë vlerësohet në disa miliona franga. Megjithatë në krahasim me vitin e kaluar ka pasur një rënie të vogël.