Shfajësohet sërish Hilderbrand

Edhe raporti i dytë nuk lë dyshime në pafajësinë e ish-kryetarit të SNB-BNS-së, Philipp Hilderbrand

Një raport i sërishëm ekspertize i mandatuar nga Këshilli Federal ka konfirmuar se Philipp Hilderbrand, ish-president i Bankës Nacionale Zvicerane, nuk i ka shkelur rregulloret e brendshme të Bankës Nacionale Zvicerane (SNB- BNS), kanë njoftuar agjencitë e lajmeve të Zvicrës.

Në fakt, rregullorja e deritanishme e SNB-BNS-së është aq liberale sa që anëtarët e bordit të saj mund të kryejnë operacione këmbimi, edhe atë para vendimeve të rëndësishme të këtij institucioni.

Sipas raportit në fjalë, Ph. Hilderbrand nuk është fajtor, edhe pse ndërkohë u botua informacioni i bazuar në shkëmbimet e tij të fundit përmes e-mailit, se ai i kishte dhënë pëlqimin bankierit të “Sarasin” për blerjen e 500.000 dollarëve nga bashkëshortja e tij.

Mirëpo, ekspertiza në fjalë thotë se rregullorja e SNB-NBS-së duhet të ndryshojë. Një propozim për ndryshimin e kësaj rregulloreje, si dhe një ekspertizë e pavarur do të duhej të propozoheshin nga Këshilli mbikëqyrës i Bankës Nacionale.