Shërbimet shëndetësore, barrë serioze për shumicën

Çdo i dhjeti i siguruar shëndetësor ishte i detyruar të vendoste në mes të shpenzimeve shëndetësore dhe artikujve jetësorë

Kostoja e shëndetësisë për shumë veta në Zvicër përbën një problem serioz. Këtë gjendje e pasqyron një sondazh i bërë me 1000 persona, nga Deloitte.

Sipas sondazhit, 72 për qind e të pyeturve, njerëz me sigurime shëndetësore, me rastin e blerjes kufizojnë veten në gjërat më elementare jetësore.

Afërsisht çdo i dhjeti i siguruar shëndetësor gjatë vitit të kaluar ishte i detyruar të vendoste në mes të shpenzimeve shëndetësore dhe artikujve jetësorë. D.m.th.: në mes të barnave ose shpenzimeve tjera mjekësore dhe gjërave ushqimore, arsimimit dhe banimit.

3 për qind të pjesëmarrësve të sondazhit kishin probleme serioze për të paguar llogaritë e mjekut ndërsa 5% janë detyruar të marrin borxhe për t`i paguar këto llogari.

Përfundimisht, një shumicë e të anketuarve e konsideron shëndetësinë shumë të shtrenjtë.