Shaqiri shënon, Zvicra fiton edhe kundër Perusë

Para se të niset në Brazil, ekipi i Zvicrës e ka fituar edhe ndeshjen e fundit miqësore me skuadrën e Perusë me rezultat 2:0

Pjesa e parë e ndeshjes para 15 mijë spektatorëve në Lucern ka përfunduar pa gola me titullarë Valon Behrami, Granit Xhaka dhe Admir Mehmedi.

Valon Behrami zëvëndësohet nga Blerim Xhemajli, kurse Xherdan Shaqiri inkuadrohet në vend të Xhakës pas 64 minutave lojë.

Helvetikët kalojnë në epërsi me golin e Stephan Lichtsteiner në minutën e 78-të.

Ndërsa fitoren e Zvicrës e ka siguruar Xherdan Shaqiri duke shënuar golin e dytë në minutën e 84-të.

Me dy fitore kundër Xhamajkës dhe Perusë, Zvicra ka përfunduar edhe parapërgatitjet për Botërorin “Brazili 2014”.

Për përfaqësuesen zvicerane tashmë ka përfunduar kampi i stërvitjeve në Weggis. Futbollistët zviceranë do të pushojnë të mërkurën dhe të enjten para se të nisen për në Brazil.