Sërish dridhje të tokës në Shqipëri

Mesnatën e kësaj të premteje janë shënuar tre tërmete të reja, dy në harkun e 3 minutave në Adriatik dhe në zonën përreth Gjirit të Lalzit

Lëkundjet sizmike që po prekin Shqipërinë janë bërë tashmë një rutinë e zakonshme.

Prej dy ditësh, toka lëkundet ditë e natë, edhe pse magnitudat e këtyre të fundit kanë qenë më të ulëta sesa tërmeti që shkaktoi panik ditën e mërkurë në orën 11:01.

Mesnatën e kësaj të premteje janë shënuar tre tërmete të reja, dy në harkun e 3 minutave në Adriatik dhe në zonën përreth Gjirit të Lalzit, konkretisht 49 dhe 51 minuta pas mesnatës dhe me magnituda 4.3 dhe 3.7, ndërsa lëkundja e orëve të para të mëngjesit është regjistruar në orën 5:51 me magnitudë 3.1, shkruajnë mediat shqiptare.

Lëkundja më e fuqishme ka qenë ajo e rënë në Adriatik, por që është ndjerë nga qytetarët, pa shkaktuar gjithsesi dëme, përcjell albinfo.ch.

Lëkundje ka pasur edhe një natë më parë, derisa tërmeti i së mërkurës ishte më i madhi, madje, duke u ndjerë edhe në Kosovë e Maqedoni.

Sizmologët kanë paralajmëruar se këto lëkundje janë të zakonshme, dhe mund të ndodhin edhe në vazhdim.