Lajme

Serbia ndalon aterrimin e aeroplanëve të Malit të Zi

E martë, 26 Maj 2020 - 23:00 albinfo.ch

Me vendim të drejtorisë për aviacion civil të Serbisë, aeroplanët e kompanisë nacionale të Malit të Zi, “Montenegro Airlines”, prej të mërkurës nuk kanë leje për të aterruar në aeroportin e Beogradit, “Nikola Tesla”, kanë raportuar mediat serbe.

Ky vendim është kundërmasë e vendimit të autoriteteve malazeze që kufijtë e këtij vendi mos t’i hapë për qytetarët e Serbisë, për shkak të koronavirusit, shkruajnë mediat shqiptare, përcjell albinfo.ch

Të hënën kryeministri i Malit të Zi, Dushko Markoviq ka thënë se do të hapen kufijtë për banorët e vendeve që kanë më pak se 25 të infektuar për 100 mijë banorë, si Kroacia, Sllovenia, Austria, Gjermania, Hungaria, Shqipëria e Greqia.

Në shpjegimin e vendimit të drejtorisë së aviacionit civil të Serbisë thuhet se me pamundësimin e hyrjes së qytetarëve të Serbisë në Mal të Zi, është dëmtuar rëndë principi i reciprocitetit në lëvizjen e udhëtarëve në mes të dy vendeve.

Të hënën kryeministrja e Serbisë, Ana Brnabiq ka thënë se ky vend nuk do të mbyll kufijtë për qytetarët e Mali të Zi, ndërsa u ka bërë thirrje serbëve që mos të shkojnë atje ku nuk janë të mirëpritur.